Txertaketarekin EAEko Jaurlaritza bertsolaritza-ariketa egiten ari da, eta, inprobisatuz, eta irizpideak aldebakarrez zehazten. Txertoa dela-eta mutualitate pribatuekin hasitako negozioa alde batera utzita, Osakidetza da orain inprobisatzen hasi dena.
Herri honen kudeatzaile legez beraien burua maisu-maistratzat dutenak, egunez egun ari dira irizpideak aldatzen, langileokin partekatu gabe eta Teleberria zuriketarako eta propagandarako erabiliz.
Nahiz eta oraingo irizpideen arabera eskoletan lan egiten duten langile guztiei dagokien txertatzeko aukera (baita logopeda, praktiketako irakasle, arratsaldeetako begiraleei… ere), hau da, nahiz eta milaka langileri zabalduko zaion txertatzeko aukera, Jaurlaritzak ez du Lan Osasun Batzorderik deitu txertatzea planifikatu ahal izateko.
Planifikazioa beharrezkoa da, ematen ari diren hainbat desoreka ekiditeko: ikastetxe bereko langile guztiak ez daitezen momentu berean txertatzera joan (ikasleak zerbitzurik gabe utziz) eta txertoaren balizko albo kalteek ez dezaten eskolaren funtzionamendua baldintzatu (txertoa jaso osteko egunean hainbat langilek bajan egon behar dutelako).
Horregatik eskatzen dugu:
o Eskoletako lehen lerroan dauden langile guztiek txertatzeko aukera jasotzen dutela bermatu dadila, garbitzaileak barne. Eta neurri berean, jarraipen estua egin dadila Basurto eta Santa Marina ospitaleetan gertatutakoak errepika ez daitezen.
o Txertaketa eskolako egunerokotasuna oztopatu gabe burutuko dela bermatuz planifikatu dadila. Pandemiak areagotu zuen arrakala pedagogikoari erantzun nahian ari garen honetan, txertoak sortzen dituen ondoezek ez dezatela ikasgeletako lana baldintzatu.
o Txertoa jasoko duten eskoletako langile-errolda zabalik mantendu dadila aurrerantzean. Milaka dira ordezkapenak egiten dabiltzan langileak, eskola finkorik gabe. Horregatik, ordezkapena hastearekin batera txertoa jasotzeko aukera guztiek izan beharko lukete.
