Martxoan eta apirilean deitutako greba zikloan Eusko Jaurlaritzako Hezkuntza Sailak negoziaketak eten ondoren eta mobilizazioetan irakasleek indarra eta konpromisoa erakutsi ostean, negoziaketetarako bidea egingo zuela adierazi zuen hedabideetan Begoña Pedrosa Hezkuntza sailburuak, baina hitzetatik ekintzetara pasa ez izana eta negoziaziorako benetako borondaterik ez duela salatu du LABek.
Urtarrilean hasitako bederatzi greba egunetan irakasleek erakutsitako konpromisoak Hezkuntza Saila negoziaketak berrartu eta proposamen berriak egitera behartu du. Azken greba zikloaren ondoren, apirilaren 4an izandako lehen eta azken bileran, egutegi baten berri eman eta ikastetxeen beharrei bere osotasunean erantzuten ez zien baliabide gutxi batzuk aurkeztu zituen, ahoz. LABek egutegi horren bidez negoziaketak luzatu nahi zirela salatu zuen arren, sailak aurrera eramatea erabaki zuen, eta ondoren, gainera, ez du bertan jasotakoa bete. Izan ere, egutegiaren arabera, apirilaren 16ra bitarte luzatzen zen negoziaketa gauzatzeko administrazioak hartutako konpromisoa.
Era berean, LABek uste du propagandan eta jendartearen iritzi publikoan eragitean jarri duela indarra Hezkuntza Sailak, alde batera utziz negoziaziorako eta akordioetara iristeko bide guztiak. Are gehiago, sailak gutxietsi egin nahi izan du hezkuntza publikoa indartuko duten lan baldintzen eta ikastetxeek hainbeste behar dituzten baliabideen aldeko borroka, kalitatezko hezkuntza helburu duena. Horretarako, LABek ezinbestekotzat jo du inbertsio publikoa handitzea, eskola publikoa sistemaren ardatza izan dadin.
LABek behin eta berriz adierazi izan du negoziaketarako duen prestasuna. Horren erakusle dira lehen indarra den hezkuntza publikoko gainontzeko kolektiboetan langileen alde egindako borrokaren eta lanaren ondorioz lortutako akordioak. Beraz, LABek negoziaketarako benetako jarrera bat izan dezan exijitzen dio Hezkuntza Sailari.
2025-04-16-LAB_irakaskuntza_EU
