Bederatzigarren greba eguna izan da gaurkoa. Milaka eta milaka irakaslek urtarriletik hona kaleak hartu ditugu. Horregatik, LABetik zorionak eman nahi dizkizuegu irakasle guztiei, gaur arte erakutsitako ilusio eta indarragatik.
Hezkuntza Sailari hezkuntza publikoa indartu eta urgentziaz behar duen inbertsio publikoa gauzatzeko garaia dela exijitu diogu behin eta berriz.
Egoera honetan, irakasleon lan baldintzak hobetzeko hitzarmena berritzea urgentziazkoa da. Herri honek dituen erronkei erantzungo dioten baliabide eta neurriak txertatu behar dira bertan, aniztasunari erantzuteko eta hezkidetza eta euskara indartzeko.
Horregatik, Hezkuntza Sailari mezu zuzena bidali nahi diogu: LABek prestutasun osoa dauka negoziatzen jarraitu eta akordioetara iristeko. Baina honetarako eduki zehatzak eta borondatea behar dira. Bi aldagai horiek egon ezean, greba ziklo berri bati ekiteko gure borondatea eta indarra adierazten dugu.
Orain arte bezala, datozen urratsak ere, LABeko komunitatea osatzen duzuen kideokin batera pentsatu eta eramango ditugu aurrera.
Honegatik, hurrengo asteetan deituko ditugun asanbladetan parte hartzera animatzen zaituztegu.
Akordio duin bat lortu arte borrokan jarraituko dugu!
Gora langileon borroka!
Gora LAB!
