9. greba egunak jarraipen zabala izan du eta hurrengo fasera pasatzea beste alternatibarik ez die utziko Hezkuntza Sailak benetako negoziaziorik egon ezean.
Pasa den asteko asteleheneko mahai negoziatzailearen ondoren, Hezkuntza Sailak aukera izan du negoziazioarekin aurrera egiteko, baina ez du inongo aurrerapausurik eman eta grebak bertan behera uztea jarri du negoziaketarako baldintza gisa.
LAB, STEILAS, ELA eta CCOO sindikatuek gaur deitutako grebak jarraipen zabala izan du, aurreko deialdietan bezala; izan ere, grebara deitutakoen %75ak babestu du greba eta mobilizazioetan geroz eta jende gehiagok hartu parte. Grebaren ziklo honetan “Lan baldintzak hobetu, hemen eta orain erabakita!” lelopean deitutako mobilizazioan milaka langile ari dira elkartzen eta behin eta berriz salatu dute Hezkuntza Sailaren jarrera.
Greba hauetan azaleratzen ari diren arazoak eta arazo hauei aurre egiteko eskaerak hezkuntza publikoa eta ikasleen beharrei erantzutearekin zerikusirik ez balute bezala mintzo da. Halabaina, ikasleen behar desberdinei erantzuteko baliabideak gehitzea, enplegua eta hezkuntza taldeak egonkortzea edota plantilak gazteberritzea hezkuntza publikoa indartzea da.
Irakasleek argi utzi dute zein den beraien asmoa eta helburu horrekin borrokan tinko jarraituko dute benetako negoziazioa gauzatu arte. Grebak dira Jaurlaritza mugiarazten dutenak. Sindikatuok negoziazio erreala burutuzea nahi dute, hitz eta asmo politetatik harago. Edukia, zehaztapena eta konkrezioa behar du balizko akordioak.
Bederatzigarren greba egun honetan ere, irakasleok oso mezu argiak helarazi dizkiote Hezkuntza Sailari:
- 15 urte direla hitzarmena eguneratu gabe; eta aski dela.
- Lan zamak arintzea, plantilak gazteberritzeko plan egokia ezartzea, enplegu publikoa kontsolidatu eta bermatzea, eros ahalmena berreskuratzea, lan osasuna zein euskara eta hezkidetza bermatzeko neurriak proposatzeko garaia dela.
- Ez badago aldarrikapen hauekiko erantzunik grebetan jarraitzeko indarrekin daudela.
Beraz, Hezkuntza Sailari eduki, zehaztapen eta konkrezioak dituzten idatziz jasotako proposamenak eta hauek lantzeko mahaiak deitzeko exijitzen diote inolako baldintzarik gabe. Hezkuntza publikoa indartzeko ezinbestekoa da inbertsioa handitzea eta lan baldintzak hobetzea eta eskola publikoa baliabideez hornitzea.
Hezkuntza Sailaren deiaren zain geratzen dira, negoziatzeko eta adostasunetara heltzeko borondaterik aurkeztu ezean greba dinamikaren hirugarren fasea planteatzea beste aukerarik ez die utziko.
