Lanbide Heziketan, Euskaraldirik ez

(EAE, Lanbide Heziketa)

Euskaraldiaren kanpaina betean, EAEko Jaurlaritzari neurriak eskatzen dizkiogu

Euskaraldiaren kanpainan murgilduta gauden honetan, Jaurlaritzaren itxurakeria salatu nahi dugu. Euskararen alde egiten dituen keinuak lau haizetara zabaltzen dituen arren, errealitatea bestelakoa da Lanbide Heziketan: euskaldun askoren euskaraz ikasteko aukerak urriak izaten dira, euskaraz ikasteko eskubidea bera urratuz.

Euskal Autonomia Erkidego osoan euskara hizkuntza ofiziala bada ere, zonalde batzuetan euskararen presentzia ez da agerikoa, eta, gainera, Eusko jaurlaritzak ez du Lanbide Heziketan oro har hau aldatzeko pausurik ematen. Izan ere, datuak kritikoak dira: D ereduaren eskaintza Araban %45ekoa da eta Bizkaiko Ezkerraldean, berriz, %34koa. Lanbide Heziketan euskaraz ikasteko aukerak oso urriak diren bitartean, gaztelaniaz ikasteko aukera ia %100 da.

Bestetik, agerian utzi beharra dago Lanbide Heziketan eskaintzen den B ereduan gaztelania hutsean ikasi nahi duenak baduela aukera eta euskara hutsean ikasi nahi duenak, aldiz, ez. Hau da, Lanbide Heziketako B ereduan ikasgai guztiak gaztelaniaz ematen dira, eta ikasgai batzuetan soilik bikoizten dira euskaraz eta gaztelaniazko eskaintza duten taldeetan.

Hau guztia dela eta, LABetik EAEko Jaurlaritzari eskatzen diogu itxurakeriak eta propaganda faltsuak alde batera utzi eta benetako neurriak har ditzala Lanbide Heziketa euskaldun baten bidean.

Lanbide Heziketa euskaldun baten alde borrokon jarraituko dugu!

Etiketak , , , | Utzi iruzkina

Haurreskoletako Partzuergoan grebara goaz

(EAE, Haurreskolak)

Aurrekontu faltagatik Haurreskolak Partzuergoan indarrean dugun Lan Hitzarmena eta sinatuta dauden akordio desberdinak ez dituela betetzen onartu zuen Zorione Etxezarraga Partzuergoaren gerenteak Legebiltzarreko Hezkuntza Batzordean pasa de astelehenean, hilak 16.

Gauzak horrela, ikasturte honetan oraindik mahai negoziatzailea deitu gabe jarraitzen dute, Hezkuntza saileko ordezkariaren zain dago gerente dugun Zorione Etxezarraga anderea, Bildarratzen Hezkuntza sailak albo batera utzi gaitu. Pazientzia agortu zaigu.

0-3 hezkuntza-zikloaren garrantziaren aitortza eskatzeaz gain, jaiotzatik hezkuntza-eskubidea aldarrikatzen dugu eta, horregatik, Haurreskolak Partzuergoaren erabateko doakotasuna eta sarbide unibertsala bermatzea eskatu ditugu.

Haurreskolak Partzuergoko hitzarmen eta akordio desberdinak ez dira betetzen ari, eta, ondorioz, haur hezitzaileon eta kudeaketako langileen lan baldintzak okertu eta zerbitzuaren kalitatea kolokan jarri dira.

Irakaskuntza publikoko gainontzeko kolektiboetan lan-hitzarmen berrien negoziaziorako atea zabaldu denean, gurean oraindik aurrekontuek mugatuta gaude. Horrela, gure eskubideak zapalduta ikusten ditugu egunero eta, bitartean, Eusko Jaurlaritzak Haurreskolak Partzuergo publikoaren etorkizuna kolokan jartzen du.

LAB, STEILAS eta ELA sindikatuok Haurreskolak Partzuergoaren aurrekontua handitzeko momentua dela azpimarratu nahi dugu. Era berean, Zorione Etxezarragaren dimisioa eta Hezkuntza Sailaren kudeaketa zuzena exijitzen ditugu: bada garaia Jokin Bildarratz Hezkuntza Sailburua arduraz jokatzen hasi eta dagokion erantzukizuna bere gain hartzen hasteko.

Egoeraren larritasuna kontuan hartuta, haurreskoletako langileoi mobilizazioekin jarraitzea eta sakontzea beste biderik ez zaigu geratu. Momentuz abendurako bi greba-egun deitzea adostu dugula, abenduaren 10 eta 16an, honako aldarrikapen hauen baitan:

Haurreskolak Partzuergoaren gerenteari,

  • Lan-hitzarmen eta akordio desberdinak berehala betetzen hasteko konpromisoa har dezala: desplazamendu gehiago ez gauzatu, aparteko orduen erabilerarekin bukatu, ordezkapenak bete, e.a.
  • Hezkuntzako beste sektoreetan bezala, Lan-hitzarmen berriaren negoziazioa abian jartzeko konpromisoa.

Eusko Jaurlaritza eta Hezkuntza Sailari,

– Irakaskuntza publikoan Osakidetzak egiten duen NBEen horniketan Haurreskolak Partzuergoa sartzea

– Haurreskolak Partzuergoaren integrazioa Hezkuntza Sailean.

– Hurrengo urteko aurrekontua handitzea Legebiltzarrak eskatutako doakotasunean urratsak emateko, lan-hitzarmen eta akordioak bete ahal izateko eta kalitatezko hezkuntza zerbitzua bermatu ahal izateko.

Kategoriak Uncategorized | Etiketak , , , | Utzi iruzkina